Nabiza Girl | Isabel Risco, Carlos Ares e Manel Cráneo

• Título: Nabiza Girl.
• Autor: Isabel Risco, Carlos Ares e Manel Cráneo.
• Editorial: Concello da Coruña.
• Lugar: A Coruña.
• Ano de edición: 2023.
• Número de páxinas: 12.
• Prezo: De balde na web isabelrisco.eu

Superheroína rural

Nabiza Girl, é un personaxe creado pola actriz Isabel Risco, inicialmente, para o teatro. Así e todo, esta superheroína enxebre xa se transformou nun proxecto multimedia con presenza en múltiples soportes, dos escenarios saltou primeiro á internet cunha webserie e, agora, no derradeiro pinchacarneiro, chega á banda deseñada con este mini volume titulado Nabiza Girl, Operación Breogán. Esta obra, pequena en páxinas e grande en talento, foi editada polo Concello da Coruña, a través dun programa de axudas a artistas da cidade, cunha tiraxe de douscentos exemplares en papel para ser distribuído na rede de bibliotecas e nos centros de ensino de secundario da cidade, aínda que tamén ten acceso de balde a través da internet para a súa lectura online na páxina da propia actriz.

Nabiza girl é a identidade segreda de Chelo García Naveira, unha rapaza que logo de verse exposta a un exceso de sulfatos acadou superpoderes e que non acouga perante as inxustizas e os ataques á nosa cultura e que, así mesmo, está ben orgullosa do súa orixe rural.

Nesta primeira entrega en formato BD a nosa peculiar agro-heroína terá que atopar a espada de Breogán nunha historia chea de humor e aventuras; amor e acción, nunha peculiar homenaxe-parodia, chea de referencias culturais, ás aventuras dos superherois clásicos da cultura norteamericana.

Advertisement

BDG70. A revolta do cómic galego

“Memoria gráfica da nosa Banda deseñada”

Fai un par de anos, Xulio Carballo Dopico lía a súa exquisita tese doutoral, o traballo máis completo que existe sobre as orixes da banda deseñada galega aló polos anos setenta do século vinte. Un volume extenso, máis de seiscentas páxinas, que debullan polo miúdo parte da nosa historia. Reimundo Patiño, “Chichi” Campos, Xosé Díaz ou Xaquín Marín foron parte das figuras chave do amencer da nosa BD, as que Xulio reivindicaba co seu ímprobo traballo de investigación. Froito daquela tese naceu o proxecto expositivo BDG70. A revolta do cómic galego que foi inaugurado a finais de 2016 na sala Normal da Universidade da Coruña co gallo da conmemoración do aniversario da exposición de banda deseñada que no ano 1973 houbo nese mesmo espazo.

Este volume recolle os traballos que foron parte daqueles primeiros tempos da BD galega, que tivo que nacer necesariamente reivindicativa e popular, cunha fonda carga intelectual e usando un medio, a BD; e un idioma, o Galego; desprezados pola cultura máis elitista. Daquela, coma hoxe, a presión sobre a nosa terra, a nosa cultura e a nosa lingua era forte. A banda deseñada foi o vehículo perfecto para un grupo de artistas que precisaban xeitos novos de expresión, unha linguaxe nova para novas voces. Un movemento reivindicativo e valente nun momento arriscado. Aquela primeira exposición mesmo sufriu o ataque violento dun grupo da ultradereita.

Publicados Altar Mutante 7 e Amair

O fanzine de “horror putrefacto e ciencia ficción grasenta” publica o sétimo número e lanza a serie Amair.

Altar Mutante Comix é unha publicación que desde 2014 reúne historietas de fantasía e terror realizadas por un amplo elenco de creadores e creadoras internacionais. Esta publicación promovida desde A Coruña polo historietistas, ilustradores e deseñadores gráficos Álvaro López e Luis Sendón xa está asentada como unha das cabeceiras de referencia do xénero, optando o ano pasado ao premio ao mellor fanzine no Salón do Cómic de Barcelona.

Para este sétimo número Jagoba Lekuona deseñou  unha impactante portada que é o pano que abre unha serie de historias a cargo do plantel autoral estable de Altar Mutante, Kike Benlloch, Diego Blanco, Manel Cráneo, Debelius, Roberto Díez, Super C, Don Rogelio J., Álvaro López e Luis Sendón. A esta excelente nómina de autores súmanse nesta entrega novos valores de enorme proxección: Gaudino, Kike J. Diaz, Gairah Love, Dani Xove e o propio Jagoba.

A outra novidade do selo é Amair, unha colección de catro números na que Kike Benlloch como guionista e Luis Sendón no debuxo. En Amair, presentan un universo orixinal de fantasía, encadrado nunha vertente escura do xénero de espada e bruxería (Sword & Sorcery). Esta é a primeira banda deseñada en galego desta editorial coruñesa e acompañando este lanzamento podemos desfrutar dunha exposición de debuxos e deseños de producción que se poderá ver do 8 ao 31 de agosto no Bar 13 (rúa Orzán 13, A Coruña).

Licor Café | VV.AA

Aquí en español.

13 grolos da Nova Banda Deseñada Galega

Dende este verán o Licor café, amais da bebida nacional da nosa terra, é un libro de Banda Deseñada. Manel Cráneo, a mente inqueda que está detrás de Demo editorial é o artífice deste excelente libro que recomplila trece historias curtas doutros tantos autores e autoras da BD do País. Conta o propio Manel no limiar que a idea levaba anos no aire, mais foi finalmente Cristian Fojón, autor dun dos episodios, quen lle puxo un titulo e quen fixo de detonador desta explosión de arte e creatividade que agromou en forma de libro. Xulia Pisón é a coordinadora deste Licor Café, escolma da Nova BD galega que xa é un imprescindíbel da nosa cultura.

A selección de autores e autoras é ben acaida e representativa, con variedade nas propostas. Hai quen xa ten publicada obra longa e hai outros e outras que aínda se moven máis na escena dos fanzines. A edición é de boa calidade, con portada a cor a cargo de Jorge Peral e interior nun expresivo e esencial branco e negro.

Nesta obra colectiva, que usa como nexo común entre as distintas historias a famosa bebida, navegamos ao longo de máis de cen páxinas polas distintas visións, estilos e narrativas destes autores e autoras. Non é só un libro con historias interesantes senón que serve coma visión panorámica da variedade da nosa BD máis nova que nestes momentos é referencia, mesmo no estado, pola súa capacidade, calidade e independencia.

Begoña García-Alén e Altar Mutante optan aos premios do 36 Saló de Barcelona

Begoña García-Alén e o fancine Altar Mutante son a representación galega nos premios do 36 Saló Internacional do Cómic de Barcelona, están nomeados nas categorias de autora revelación e mellor fanzine.

A pontevedresa foi nomeada polo seu traballo Nuevas estructuras, publicado por Apa Apa Cómics. Por outra banda o fanzine, dirixido por Álvaro López e Luis Sendón conta con colaboradores ben coñecidos na BD do país como Manel Cráneo, Xulia Pisón, ou Debelius, entre outro moitos, mais tamén con artistas internacionais coma Christian Giuseppe ou André Coelho. A publicación xa conta con seis números publicados.

Os premiados coñeceranse mañá, 13 de abril.

I Encontro de Banda Deseñada Histórica de Galiza

O primeiro Encontro de Banda Deseñada Histórica de Galicia terá lugar do 6 ao 21 de abril, dentro dos actos que se celebraran no Arde Lucus. Nesta interesante proposta participarán algúns dos principais ilustradores de banda deseñada histórica de Galicia: Víctor Boullón, Tokio, Miguel Fernández, Tomás Guerrero, Pepe Carreiro e Manel Cráneo, coordinador artístico do evento. Este encontro nace da colaboración do  Concello de Lugo  o portal www.historiadegalicia.gal e Demo Editorial e estará dividido en dúas partes; unha didáctica e educativa e outra práctica.

A primeira fase realizarase no mes de abril con obradoiros teóricos e prácticos, a segunda  será na mesma festa do Arde Lucus, onde os seis ilustradores que participan neste evento debuxarán o Lucus histórico que recrearán as distintas entidades, asociacións e veciños.

Metrópoles Delirantes 83 – Jorge Campos

Abrimos programa, como xa é norma, coas novas da BD a todo filispím. O Sr B segue aumentando a lista dos imprescindibeis, desta volta cunha bd da terra, Os Lobos de Moeche de Manel Cráneo. Falamos longo con Jorge Campos, estrea unha obra, titulada Alter-nativo e con ela unha editora, Aira das Letras, de Allariz.

 

As músicas desta emisión son:

• Arcade Fire – Everything Now.
• Vince Guaraldi Trio – O Tannenbaum.
• Ivan Ferreiro – Casa, ahora vivo aquí.
• Jimi Hendrix – All Along The Watchtower.
• Saint Etienne – Dive.

Demo Editorial levará 75 títulos galegos ao Graf Cómic de Madrid

Que Manel Cráneo é un dos santiños que máis devocionamos nas metrópoles xa o sabedes todas pero e que sen Demo editorial a BD galega estaría moi coxa.

A editora coruñesa é un motor da creación e un importante apoio para a nova BD galega. Este ano lanzou a nova colección BDG13, unha serie de antoloxías monográficas de sinaturas galegas estreada co título Licor café no pasado mes de agosto, un título xa imprescindíbel que reune a 13 autores da Nova banda deseñada galega.

Agora, seguindo con esta liña de apoio á creación do país, Demo Editorial leva ao GRAF de Madrid, onde estará presente cun stand, máis de medio centenar de fanzines e títulos autoeditados en galego e castelán que deste xeito terán presenza no festival madrileño. A editorial galega destinará o 50% do seu espazo á venta a apoiar a autores e autoras de banda deseñada emerxentes do panorama galego baixo o nome de “NOROESTE BD. Cómic desde Galicia” e non cobrará custos de aluguer nin persoal comercial e o importe íntegro das ventas irá aos seus autores, o selo editorial coruñes pretende así afianzar a súa línea de apoio e promoción ás novas xeracións da BD galega.

Metrópoles Delirantes 80 – Licor Café – Manel Cráneo, Xulia Pisón e Dani Xove

Abrimos programa coas novas da BD a todo filispím. Nos imprescidíbeis o Sr B anota a triloxía galáctica de Leo. Embarcan nesta emisión Manel Craneo, Xulia Pisón e Dani Xove, cos que falaremos do Licor café, a antoloxía da nova BD galega que ven de editar Demo Editorial. E tamén dos proxectos desta heroica editora coruñesa comandada por Cráneo.

 

As músicas desta emisión son:

• Novedades Carminha – El Vivo al Baile.
• Afterlife – Ten Thousand Things.
• The Ladybug Transistor – These Days in Flames.
• Stefan Obermaier – This Vive.
• Miguel Rios – Ahora que he vuelto.
• Jens Lekman – To Known Your Mission

Metrópoles Delirantes 64 – Xaquín Marín – BDG70, A revolta do cómic galego

Esta é unha emisión especial, gravada na sala Normal da Universidade da Coruña, na exposición BDG70 – A Revolta do Cómic Galego. No ano 1973 tivo lugar, na sala Normal a primeira exposición de BD Galega, agora máis de corenta anos despois volve a haber unha exposición de Banda Deseñada. BDG70, a revolta do cómic galego. Xa era tempo de lembrar o traballo daqueles precursores da BD galega moderna, moitos anos esquecidos, mais hoxe, facémoslles xustiza e agradecemos volvendo a ensinar a súa obra o que fixeron pola BD Galega e pola cultura propia en tempos nos que ter compromiso coa terra e o noso país era, cando menos, perigoso. Falaremos cun dos protagonistas desta primeira época da BD galega moderna e porén desta exposición, referente do cómic, o humor e a retranca, o mestre Xaquín Marín. Faremos un faladoiro con Manel Cráneo, Xulio Carballo e Margarita Amor, responsábeis de esta magnífica, e tamén, necesaria exposición e homenaxe aos pioneiros da nosa BD. Remataremos cunhas recomendacións para agasallar neste Nadal.

http://www.ivoox.com/player_ej_15178328_2_1.html?data=kpqemZ2Xdpmhhpywj5WVaZS1kZWSlaaYdo6ZmKiak5KJe6ShkZKSmaiRdI6ZmKiar6maeIyhjL3O09qJh5SZoqnbjbLFtoa3lIquptORaZi3jrLS1teJh5SZo5jd0dHJt4y4xtHW1MbSuMbnjoqkpZKU&

As músicas desta emisión son:

• Ataque Escampe – Os problemas crecen.
• Los Tamara – A outra nai.