Arquivo por etiquetas: Galicia

As lecturas do SrB: Licor Café

Aquí en español.

13 grolos da Nova Banda Deseñada Galega

LK-metropoles-delirantesDende este verán o Licor café, amais da bebida nacional da nosa terra, é un libro de Banda Deseñada. Manel Cráneo, a mente inqueda que está detrás de Demo editorial é o artífice deste excelente libro que recomplila trece historias curtas doutros tantos autores e autoras da BD do País. Conta o propio Manel no limiar que a idea levaba anos no aire, mais foi finalmente Cristian Fojón, autor dun dos episodios, quen lle puxo un titulo e quen fixo de detonador desta explosión de arte e creatividade que agromou en forma de libro. Xulia Pisón é a coordinadora deste Licor Café, escolma da Nova BD galega que xa é un imprescindíbel da nosa cultura.

A selección de autores e autoras é ben acaida e representativa, con variedade nas propostas. Hai quen xa ten publicada obra longa e hai outros e outras que aínda se moven máis na escena dos fanzines. A edición é de boa calidade, con portada a cor a cargo de Jorge Peral e interior nun expresivo e esencial branco e negro.

Nesta obra colectiva, que usa como nexo común entre as distintas historias a famosa bebida, navegamos ao longo de máis de cen páxinas polas distintas visións, estilos e narrativas destes autores e autoras. Non é só un libro con historias interesantes senón que serve coma visión panorámica da variedade da nosa BD máis nova que nestes momentos é referencia, mesmo no estado, pola súa capacidade, calidade e independencia. Seguir lendo

Advertisements

A DC Comics Style Guide de José Luis García López

Batman_GarciaLopez-Metrópoles DelirantesHai apenas un mes e medio visitaba a súa aldea natal no concello de Lalín, José Luís García López, alí tivemos o privilexio de falar con el na presentación do cuarto número de Castelao de Ivan e Inacio, un home sinxelo e humilde, pero sobre todo, moi agradábel, que se mostraba sorprendido pola repercusión do seu traballo.

Entre outros traballos, José Luís ilustrou para DC a iniciativa de Warner Bros, a guía de personaxes da compañia, a referencia para outros autores e tamén para o merchandising. A DC Comics Style Guide é un traballo de 1982 da que a páxina de fans en Facebook “José Luis García-López Fans”  pendurou na rede  máis de  200 páxinas, nas que atoparemos os deseños de personaxes, e guías de cor. Un traballo realmente importante e de altísima calidade que podedes (e debedes) ver aquí.

Vía

Astérix en galego

Astérix Cleopatra2-Metrópoles Delirantes

Portada de Astérix e Cleopatra de Mas-Ivars Editores

Tras ter recibido algún comentario na entrada sobre a tradución de Tintín ao galego, toca revisar outro dos grandes heroes da banda deseñada; o irreductible galo Astérix.

Astérix foi traducido en 1976, uns anos antes que Tintín (se seguimos ese paralelismo entre os heroes de Francia e Bélxica).

A edición correu a cargo da Librería Arenas da Coruña baixo o selo “Mas-Ivars”, quen tivo unha grande actividade entre os anos 1974 e 1978, publicando, entre outras personaxes,  as aventuras de Astérix traducidas ao valenciano, catalán, euskera e galego.

A tradución ao galego foi feita polo escritor Eduardo Blanco-Amor, e polo seu irmán Juan.

Nesa primeira etapa, os libros traducidos foron:

  • A loita dos xefes
  • Astérix e Cleopatra
  • Astérix e os normandos
  • Astérix lexionario
  • Astérix na Helvecia
  • Astérix o galo
  • Astérix e os godos
  • Astérix e a fouce de ouro
Astérix Cleopatra-Metrópoles Delirantes

Portada redeseñada de Astérix e Cleopatra para Grijalbo/Galaxia

Con posterioridade, os dereitos pasaron a mans da Editorial Galaxia quen conxuntamente con Grijalbo-Dargaud editou 14 libros entre 1992 e 1998:

  • A cizaña
  • O combate dos xefes
  • Astérix nos xogos olímpicos
  • A gran travesía
  • Astérix gladiador
  • Astérix o galo
  • Astérix en Hispania
  • Astérix e Cleopatra
  • Astérix na terra dos bretóns
  • Astérix, os loureiros do César
  • Astérix, o fouciño de ouro
  • Astérix na terra dos belgas
  • Astérix, a volta á Galia
  • Astérix, o regalo do César

Entre os anos 2008 e 2010, Salvat edita un recopilatorio e algún libro especial como o titulado “Como caeu Obélix na marmita”. Na tradución destes volumes participou Valentín Arias, quen xa fora o responsable da tradución de Tintín ao galego .

Xa no ano 2013, a Editorial Galaxia publicou o último número en galego, “Astérix e os pictos” que foi todo un éxito de vendas, como xa nos contou Manuel Bragado cando pasou polas Metrópoles Delirantes.

Unha mágoa que aínda non poidamos desfrutar de todas as aventuras de Astérix no noso idioma.

A causa do crime, nova bd de Tokio

A CAUSA DO CRIME-Metrópoles DelirantesDemo editorial anuncia a publicación dunha nova bd, a nova obra de Tokio que chegará ao mercado a primeiros de agosto.

A historia protagonizada por unha muller, entrelaza os movementos sindicais, o terrorismo e a corrupción política dos anos oitenta coa banda sonora da Movida Viguesa de telón de fondo.

O albúm conterá un enlace a spotify e referenzas dos temas musicais que inspiraron ao autor e dos que tamén fai referenza o propio álbum.

Máis información no blogue de Demo Ed

Actualización 2/7/2014: Tamén anuncian para Agosto unha obra de Jano e Rodrigo Cota que se titulará “Nacho Camacho” e da que aínda non desvelaron máis dados.


Kiko Da Silva gaña a IX edición do “Premio de Banda Deseñada Castelao”

Kiko Da Silva é o gañador da IX edición do “Premio de Banda Deseñada Castelao” que convoca a Deputación da Coruña.

Nunha edición na que se presentaron 13 orixinais,  a participación máis alta das nove edicións que leva o premio, e na que o xurado destacou a alta calidade dos traballos a concurso, Kiko gañou cunha obra titulada “O inferno do debuxante” que conta a historia de Manuel Pardo “un autor que nunca é capaz de publicar ninguna das suas creacións porque sempre se atopa con algunha outra persona que xa o fixera antes”

debuxante-615x958

Kiko da Silva é un dos referentes da banda deseñada na Galiza, tanto pola indiscutible calidade da sua obra, coma pola sua traxectoria, sempre comprometida co sector do cómic e o humor gráfico. Publicou na revista BD Banda da que foi director, fundou e dirixiu a revista Retranca coa que chegou a sufrir o secuestro dun número por parte “dun señor de Murcia”, actualmente ven de reeditar por cuarta vez o seu exitoso libro “Fiz o neno máis porco do mundo”, publica na revista “El Jueves” e no xornal “La voz de Galicia” e  dirixe O garaxe hermético, a primeira escola profesional de bd e ilustración de Galiza que fundou no ano 2012.

Este premio engádese a unha longa lista de galardóns, coma o Premio Ourense ao mellor autor afeccionado 1996, da Casa da Xuventude de Ourense, por “Crestomatía de amor”, en 2002 un accésit no certame do INJUVE, modalidade de ilustración o Segundo premio JB de humor gráfico, o Prémio de humor do Muséu da Imprensa do Porto (Portugal) e o cuarto premio no XIV Concurso Galego de BD (1998) coa historia “Café de soidades”.

Anunciouno Montse Dopico no seu blogue

Kiko é unha das personas que apoiou dende o seu xérmolo ás Metrópoles, estamos moi ledos e queremos parabenizalo por un premio máis que merecido.

Adiantamos ós convidados ó Viñetas desde o Atlántico 2014

23_logo_vinetas_basico-Metrópoles Delirantes

Miguelanxo Prado, director de Viñetas desde o Atlántico, confirmounos que nesta edición estarán no salón Coruñes, entre outros,  Charlie Adlard, debuxante da coñecida “The Walking Dead”, Sento LLobell autor de “Un médico novato” obra gañadora do premio Fnac-Sins entido de 2013 , Montse Martín autora da triloxía “Curiosity Shop”, Zidrou  autor dos guións de “El cliente” ou “Folies Bergère” entre outras, e que adoita traballar con autores españois e Oriol Hernández debuxante de “La piel del oso” con guión de Zidrou. E representando á banda deseñada galega, Jano autor de “Operario”.

Actualización 30/6/2014: Hoxe fixeron públicos na web do salón os convidados que completan a lista, Marcos Martín (private eye)  e Javier Rodríguez (Wake Up) ademais dos que xa adiantamos nós hai uns días.

Astiberri editará o Pretty Deadly de Emma Rios

PrettyDeadly_03-1-Metrópoles DelirantesEmma Rios ven de anunciar esta tarde que a editorial Astiberri editará en España o seu Pretty Deadly, unha bd con guión de Kelly Sue DeConnick, coa que coincidiu en Marvel, e que en Estados Unidos edita Image comics.

Edu Maroño fixo unha recensión ben interesante no seu blogue un ollo de vidro e tamén escribiu en quadriños das catro nominacións ós Eisner de esta obra.

Emma estivo xa hai uns meses na sexta emisión das metrópoles.