Nabiza Girl | Isabel Risco, Carlos Ares e Manel Cráneo

• Título: Nabiza Girl.
• Autor: Isabel Risco, Carlos Ares e Manel Cráneo.
• Editorial: Concello da Coruña.
• Lugar: A Coruña.
• Ano de edición: 2023.
• Número de páxinas: 12.
• Prezo: De balde na web isabelrisco.eu

Superheroína rural

Nabiza Girl, é un personaxe creado pola actriz Isabel Risco, inicialmente, para o teatro. Así e todo, esta superheroína enxebre xa se transformou nun proxecto multimedia con presenza en múltiples soportes, dos escenarios saltou primeiro á internet cunha webserie e, agora, no derradeiro pinchacarneiro, chega á banda deseñada con este mini volume titulado Nabiza Girl, Operación Breogán. Esta obra, pequena en páxinas e grande en talento, foi editada polo Concello da Coruña, a través dun programa de axudas a artistas da cidade, cunha tiraxe de douscentos exemplares en papel para ser distribuído na rede de bibliotecas e nos centros de ensino de secundario da cidade, aínda que tamén ten acceso de balde a través da internet para a súa lectura online na páxina da propia actriz.

Nabiza girl é a identidade segreda de Chelo García Naveira, unha rapaza que logo de verse exposta a un exceso de sulfatos acadou superpoderes e que non acouga perante as inxustizas e os ataques á nosa cultura e que, así mesmo, está ben orgullosa do súa orixe rural.

Nesta primeira entrega en formato BD a nosa peculiar agro-heroína terá que atopar a espada de Breogán nunha historia chea de humor e aventuras; amor e acción, nunha peculiar homenaxe-parodia, chea de referencias culturais, ás aventuras dos superherois clásicos da cultura norteamericana.

Advertisement

Baixo o pantano | Ángela Curro

• Título: Baixo o pantano.
• Autor: Ángela Curro.
• Editorial: DemoEditorial.
• Lugar: A Coruña.
• Ano de edición: 2022.
• Número de páxinas: 64.
• Prezo: 14,90€.

Vémonos no pantano

Ángela Curro é unha autora formada nas aulas da Escola Antonio Faílde de Ourense, un centro que xa leva dado un bo número de artistas da BD,  e tamén, nas aulas da Facultade de Belas Artes de Pontevedra. Para a súa primeira obra longa, Ángela, escolleu o xénero da ciencia ficción que non é un dos máis habituais do noso cómic fóra do circuíto dos fanzines.

A historia deste Baixo o pantano comeza nun futuro onde as viaxes no tempo son posíbeis, así, calquera que poida pagalo pode trasladarse atrás no tempo. Sonia, a rapaza protagonista, decide volver ao ano 2020 na busca de respostas para as preguntas que non deixa de facerse sobre a súa avoa e a súa familia. Sonia chega a unha vila que celebra unha festa histórica –que lembra moito o Arde Lucus– onde terá que procurar a información que precisa.

Córnea. The Drop. Tralla brava. Altar mutante | VVAA

• Título: Córnea. The Drop. Tralla brava. Altar mutante.
• Autor: Varios autores.
• Editorial: Autoedición.
• Lugar: A Coruña e Ourense.
• Ano de edición: 2022.
• Prezo: Varios.

Fanzinismo ou barbarie

Desta volta, nesta sección de banda deseñada, non vou falar dunha obra publicada por unha editora senón de varias obras que se autoeditan, é dicir, son os seus autores e autoras os que para alén de crear e debuxar as historias encárganse tamén da impresión e distribución. A autoedición ten o seu propio circuíto de festivais e eventos, en teoría mais undeground, mais nos últimos tempos xa non tanto. A autoedición ten detrás un considerábel esforzo de creación e mantemento e, normalmente, o seu fin non é lucrativo senón poder financiar a seguinte edición de fanzines. Convídolles a visitar algún destes fanzines, e se gostan, a buscalos na rede e apoialos.

2 Viaxes | Xaquín Marín e Reimundo Patiño

• Título: 2 Viaxes.
• Autor: Xaquín Marín e Reimundo Patiño.
• Editorial: Editorial Elvira.
• Lugar: Vigo.
• Ano de edición: 2022.
• Número de páxinas: 128.
• Prezo: 27€.

E tódalas olladas vóltanse a uneca espranza….

No ano 1975 Xaquín Marín e Reimundo Patiño, artistas polifacéticos, que tamén traballaban no grafismo e na pintura, publicaron esta senlleira obra que sería fundacional da banda deseñada galega moderna: 2 viaxes. O álbum, editado na segunda etapa editorial de Brais Pinto, propón precisamente dúas historias, unha de cada autor, que son esas viaxes do título. A primeira é asinada por Xaquín Marín e titulada: O longo camiño de volta dende as estrelas. A segunda é a que debuxa Reimundo Patiño co titulo: A saga de torna no tempo.

Marín e Patiño crean dúas historias independentes e con estilos moi diferentes, ambas son relatos de ciencia ficción e ambas falan de temas moi actuais na Galiza daquel momento –tamén deste– que situadas en mundos imaxinarios e distópicos son un xeito de criticar a ditadura esmorecente sen ser demasiado explícitos.

El Fuego, a vindeira obra de Rubín, publicarase en galego

David Rubín é un autor prolífico como poucos mais dende El Héroe non publica unha obra na que el sexa o autor integral. Logo de moitos anos traballando con distintos guionistas, o ano pasado anunciou que estaba traballando en El Fuego, unha obra que definiu como “das obras máis persoais que fixen e tamén das máis duras” na que recuncará como autor e debuxante.

Programación do Autobán 2022

Logo do obrigado parón destes anos pasados pola Covid, o festival recupera a normalidade cunha edición presencial que decorrerá na fin de semana do 12 e 13 e servirá para retomar o pulso ao movemento fanzineiro e de autoedición galego mais tamén ao extranxeiro. O programa recolle presentacións, obradoiros o mercado de fanzines e o xa habitual e exitoso combate de debuxantes.

Como eixe do encontro, o mercado e fanzines reunirá o máis destacado da recente produción autoeditada do país, fundamentalmente no campo da ilustración e da banda deseñada

Altar Mutante 11

O fanzine de horror putrefacto máis famoso do país volve como cada verán, Altar Mutante 11 está xa nas rúas e con capa de Lidia Cao. Ademais do traballo de Lidia tamén atoparemos nas súas paxinas boa bd a cargo dos sospeitosos e sospeitosas habituais mais tamén con algún nome novo: Kike Benlloch, Diego Blanco, Alfonso Bueno, Greta Debelius, Elchinodelpelocrespo, Ennegrecido, Álvaro López, Edu Molina, Jorge Peral, Nerocrane, Rubén Rial, Jose Luis Rodríguez, Luis Sendón, Sekone, Dani Xove e Yupiyeyo.

Durante o Viñetas pódese mercar nas casetas de Demo Editorial e da AGPI Asociación Galega de Profesionais da Ilustración.

Uxía Larrosa, Luís Yang e Quico gañan o XVII Premio Castelao de BD

Onte facíanse públicos os e as gañadoras do XVII Premio Castelao de Banda Deseñada da Deputación da Coruña. ‘O bico da serea’ de Luis Yang e Uxía Larrosa na modalidade xeral namentras na modalidade LIX foi elixida a obra ‘Contando Estrelas’ de Francisco Pérez.

O xurado desta edición

‘O bico da serea’ narra a historia da relación entre unha rapaza pre-adolescente e unha serea, na se van entrelazando a vida cotiá e a rutina diaria con aspectos fantásticos e mitolóxicos. O xurado destacou da obra, o xurado salienta no seu informe “a poética e a gráfica” da proposta e indica que “o guión tamén toca diversas temáticas interesantes e con moita carga literaria que deleita os ollos e estimula a imaxinación”.

Na categoría LIX, a obra ‘Contando Estrelas’, está composta por relatos curtos protagonizados por estrelas que van tratando temáticas contemporáneas e comúns da sociedade actual como a soidade e a perda. O xurado menciona “a súa delicadeza e coidada ilustración”, así como o interese por “tratar temas cos que todas podemos sentirnos identificadas, a través das metáforas coas estrelas e por traballar con elementos do imaxinario colectivos”.

Adeus amigos | Begoña García-Alén

• Título: Adeus amigos.
• Autor: Begoña García-Alén.
• Editorial: Deputación da Coruña.
• Lugar: Coruña.
• Ano de edición: 2021.
• Número de páxinas: 72.
• Prezo: 13€.

Era un barco ben pequeno…

Begoña García-Alén é unha das autoras máis vangardistas da nosa banda deseñada, asidua dos círculos máis underground e ben coñecida pola súa militancia nos fanzines. Desta volta asina unha BD que flutúa entre ese carácter experimental e vangardista que destila toda a súa obra e un certo achegamento a unha narrativa máis convencional. Con Adeus amigos gañou o XV Premio Castelao de Banda deseñada da Deputación da Coruña na categoría xeral.
Adeus amigos conta o estraño caso da desaparición en 1975 do artista Bas Jan Ader. O artista embarcouse nun pequeno bote coa intención de cruzar o atlántico, logo de tres semanas perdeuse a comunicación con el. O bote atopouno (e trasladouno a Ferrol) un pesqueiro galego un tempo despois mais nin o artista nin o seu corpo apareceron.

Unmasked de Pablo Pereira e Silvia Santamarina nomeado aos Eisner

Unmasked é unha historia de intriga dividida en 24 capítulos que segue as aventuras dun grupo de cinco persoas que esperta nun mundo devastado e cunhas máscaras cadeadas as súas faces con pechaduras irrompíbeis.Ninguén lembra como chegou alí, pero quedar de brazos cruzados significa unha morte segura. Todo está cuberto de néboa e os poucos edificios que aínda están en pé semellan ter sufrido un cataclismo. Cando aparece un primeiro monstro, comprenden que deben matalo para poder liberar os candeados das súas lembranzas…