Arquivo da categoría: As lecturas do Sr B

Baños Pleamar | Isaac Sánchez

  • Título: Baños Pleamar.
  • Autor: Isaac Sánchez.
  • Editorial: Dolmen editorial.
  • Lugar: Palma de Mallorca.
  • Ano de edición: 2022.
  • Número de páxinas: 224.
  • Prezo: 24,90€.

Esta historia non está baseada en feitos reais. Todo o contrario, son lembranzas

Isaac Sánchez fíxose coñecido coa súa outra faceta pública, a de youtuber. Si xa sei, en principio sona mal que outro destes gurús da charlatanería dixital publique un cómic. De feito, non podemos (nin debemos) esquecer aquel lixo infecto en forma de banda deseñada que promoveu (pagou, que non creou) un dos máis populares destes telepredicadores douspuntocero. Sorprendentemente –si recoñezo o meu prexuizo– a obra de Isaac ten moita calidade e é un cómic con maiúsculas.

A historia sucede na Badalona dos años 90 cunha costa tan contaminada que na primeira liña de praia existía un peculiar tipo de negocio que consistía en locais que eran a un tempo restaurante e piscina, de xeito que os veraneantes podían tomar o sol na praia e bañarse nas piscinas destes chiringuitos. Un destes establecementos foi propiedade –e vivenda– da familia de Isaac.

Seguir lendo
Advertisement

Nabiza Girl | Isabel Risco, Carlos Ares e Manel Cráneo

  • Título: Nabiza Girl.
  • Autor: Isabel Risco, Carlos Ares e Manel Cráneo.
  • Editorial: Concello da Coruña.
  • Lugar: A Coruña.
  • Ano de edición: 2023.
  • Número de páxinas: 12.
  • Prezo: De balde na web isabelrisco.eu

Superheroína rural

Nabiza Girl, é un personaxe creado pola actriz Isabel Risco, inicialmente, para o teatro. Así e todo, esta superheroína enxebre xa se transformou nun proxecto multimedia con presenza en múltiples soportes, dos escenarios saltou primeiro á internet cunha webserie e, agora, no derradeiro pinchacarneiro, chega á banda deseñada con este mini volume titulado Nabiza Girl, Operación Breogán. Esta obra, pequena en páxinas e grande en talento, foi editada polo Concello da Coruña, a través dun programa de axudas a artistas da cidade, cunha tiraxe de douscentos exemplares en papel para ser distribuído na rede de bibliotecas e nos centros de ensino de secundario da cidade, aínda que tamén ten acceso de balde a través da internet para a súa lectura online na páxina da propia actriz.

Nabiza girl é a identidade segreda de Chelo García Naveira, unha rapaza que logo de verse exposta a un exceso de sulfatos acadou superpoderes e que non acouga perante as inxustizas e os ataques á nosa cultura e que, así mesmo, está ben orgullosa do súa orixe rural.

Nesta primeira entrega en formato BD a nosa peculiar agro-heroína terá que atopar a espada de Breogán nunha historia chea de humor e aventuras; amor e acción, nunha peculiar homenaxe-parodia, chea de referencias culturais, ás aventuras dos superherois clásicos da cultura norteamericana.

Seguir lendo

Becky Riot | Mariano Pardo

  • Título: Becky Riot.
  • Autor: Mariano Pardo.
  • Editorial: Astiberri.
  • Lugar: Bilbao.
  • Ano de edición: 2022.
  • Número de páxinas: 200.
  • Prezo: 25€.

Becky contra todo o puto mundo

Esta BD conta a vida dunha adolescente, Becky, que está vivindo esta etapa vital dun xeito especialmente complicado. Becky non é a rapaza con máis éxito no instituto, os seus pais están divorciados e ela transita  cada día por unha montaña rusa emocional.

Está obra de Mariano Pardo é un interesante documento gráfico e narrativo sobre esa etapa de transición da vida infantil á adulta. Por veces realista e por veces psicodélico mais, en todo caso, conservando esa capacidade das ficcións ben construídas de veracidade.

Becky é unha pésima estudante que non aproba ningunha e á que o resto do alumnado ignora e mesmo rexeita. Acoso entre iguais e desprezo dun sistema deseñado para estandarizar que rexeita as personalidades distintas. Becky Riot sinala moi ben os problemas dun sistema de merda.

Un guión episódico, vese a influencia do estoupido das series, sobre todo dos Simpson, e que non escatima en mala hostia, humor negro, crítica social e unha pingas de punk. Din os materias promocionais da editora que ten influencias de «Todd Solondz, de Daniel Clowes e de Simon Hanselmann». E si, tenas.

Seguir lendo

Escucha, hermosa Marcia | Marcello Quintanilha

  • Título: Escucha, hermosa Márcia.
  • Autor: Marcello Quintanilha.
  • Editorial: Astiberri.
  • Lugar: Bilbao.
  • Ano de edición: 2022.
  • Número de páxinas: 128.
  • Prezo: 20€.

Sei suspirar, sei morrer

Escucha, hermosa Márcia é o título do último traballo de Marcello Quintanilha (Tungsteno, Talco de Vidrio), unha obra excelente que foi premiada co Fauve d’or en Angulema o pasado ano –o premio máis importante na BD europea–. Esta é outra desas historias que tan ben constrúe o brasileiro e que nos seducen cunha sinxeleza aparente que a medida que avanza vaise retorcendo sobre si propia até tecer un relato complexo e moi verídico da realidade.

Desta volta trae ás viñetas un anaco da vida de Márcia, unha enfermeira que reside nunha favela de Río de Janeiro co seu mozo Aluísio e a súa filla, Jaqueline. A moza, rebelde e bocalana, anda cos membros dunha das bandas do barrio o que provoca continuos enfrontamentos entre nai e filla. A situación faise grave cando a policía detén a Jaqueline como cómplice dun roubo. Márcia e Aluísio descobren que a rapaza está involucrada con mafiosos de alto nivel e cun grupo de policías corruptos.

Seguir lendo

O navegante | Tristán Ron

  • Título: O navegante.
  • Autor: Tristán Ron.
  • Editorial: Chévere.
  • Lugar: Santiago de Compostela.
  • Ano de edición: 2022.
  • Número de páxinas: 96.
  • Prezo: 18€.

Unha viaxe a bordo da sala NASA

O albúm de debut de Tristán Ron é unha pequena alfaia que repasa a historia da Sala NASA, aquel espazo artístico impulsado polo grupo de teatro Chévere que funcionou durante os anos noventa e primeiros dous miles como sala de teatro e espazo escénico multidisciplinar até que a persecución política do partido popular culminou no seu peche arbitrario por parte do goberno de aquel nefasto alcalde ultra, fanfurriñeiro, e afortunadamente efémero, chamado Conde Roa que padeceu Compostela. Tristán medrou na sala, que converteu no seu particular espazo de xogo nos primeiros anos. Agora, xa mozo e graduado en Belas Artes, fai nesta primeira BD, un percorrido pola historia da sala.

Seguir lendo

O lume | David Rubín

  • Título: O lume.
  • Autor: David Rubín.
  • Editorial: Demo Editorial.
  • Lugar: A Coruña.
  • Ano de edición: 2022.
  • Número de páxinas: 256.
  • Prezo: 35€.

O lume nunca se apaga

Non imos descubrir a estas alturas do conto a Rubín, unha forza da natureza no humano e no artístico. Imposíbel non sucumbir á súa arte, á plasticidade dos deseños, á capacidade compositiva, á cinemática, a ese uso tan persoal e excepcional da cor. En resumo, á cultura comiqueira que condensa cada páxina.

Unha década após da publicación do Heroe, unha das mellores obras da BD feitas no estado español, o David volve a asinar unha obra como autor completo. O resultado é un cómic valente, denso, duro, excesivo, emocional e barroco. Rubín abre as carnes, saca das vísceras un guión que fala de destrución e de inxustiza, de poder e culpa, do mundo cada día máis turbo-capitalista e ultra-clasista que nos trouxo este demo da dixitalización, as megacorporacións e os macrodatos. Sen dúbida é unha obra moi persoal dun autor magnífico que está nun momento de madurez lúcida e virtuosa. É, tamén, unha obra complexa a todos os niveis na que se destapan as esencias do Rubín máis literario e intimista para construír unha distopía tan real e pesimista que queima. 

Seguir lendo

Rosa | Gaëlle Geniller

  • Autor: Gaëlle Geniller.
  • Título: Rosa.
  • Editorial: Ediciones La Cúpula.
  • Lugar: Barcelona.
  • Ano de edición: 2022.
  • Número de páxinas: .
  • Prezo: 34€.

Por todos os xardíns do mundo

A capa desta banda deseñada dá un aviso certeiro do que atóparemos nas páxinas interiores, unha marabilla gráfica dunha elegancia e beleza excepcional que desenvolve unha historia tan fermosa coma entretida.

O Xardín é un cabaré de ambiente familiar no París dos anos vinte. Rosa, o fillo da propietaria, é un rapaz criado entre boas de plumas e veludo vermello que quere bailar, que precisa expresarse e desenvolver a súa vida como artista no escenario, o que non sabe é que está a punto de converterse na sensación da noite parisina e os cambios que tal éxito traerá.

Seguir lendo

Little neno descobre a David Bowie | Dani LLabrés e Jaime Pantoja

  • Título: Little Neno descobre a David Bowie.
  • Autor: Dani Llabrés e Jaime Pantoja.
  • Editorial: A Reixa Editorial.
  • Lugar: Santiago de Compostela.
  • Ano de edición: 2022.
  • Número de páxinas: 32.
  • Prezo: 15€.

Dentro do labirinto

Un ano despois da primeira incursión de A Reixa no panorama dos libros infantís publica a terceira entrega desta colección na que o pequeno cativo soñador vai descubrindo artistas senlleiros da historia da música.

Dani Llabrés e Jaime Pantoja, coa  excelente tradución ao galego de Valeria Pereiras, guían a través dos textos e os deseños ao pequeno Neno polos mundos oníricos, cambiantes e sempre fantásticos do Gran Duque Branco, do camaleónico e multifacético, David Bowie. 

Seguir lendo

Black is Beltza. Ainhoa |Fermín Muguruza, Harkaitz Cano e Susanna Martín

  • Título: Black is Beltza. Ainhoa.
  • Autor: Fermín Muguruza, Harkaitz Cano e Susanna Martín.
  • Editorial: DemoEditorial.
  • Lugar: A Coruña.
  • Ano de edición: 2022.
  • Número de páxinas: 128.
  • Prezo: 22€.

Non hai revolución sen cancións

Ainhoa nace en Bolivia e medra en Cuba. No 1988 comeza unha viaxe para coñecer Euskal Herria, terra do seu pai, onde coñece a Josune, unha xornalista comprometida.

Ainhoa e Josune comezan xuntas unha viaxe que as levará do Líbano a Afganistán e a cidade de Marsella. Son os derradeiro anos da Guerra Fría e ámbalas dúas descubrirán o escuro mundo das redes do narcotráfico e os estreitos vínculos destas coa política.

Esta é a segunda entrega en banda deseñada universo Black is Beltza, o proxecto transmedia impulsado por Fermín Muguruza, que non só completa senón que mellora a anterior. A historia de Manex e as súas viaxes eran interesantes, trepidantes e aditivas e as da súa filla non son menos. Desta volta a acción parte dos derradeiros anos da década dos oitenta, uns anos intensos, cos ianquis metidos en fariña, financiando á contra en Nicaragua e aos talibanes en Afganistán. Anos convulsos tamén no estado español, nos que o conflito vasco estaba no momento máis duro de violencia e represión e a heroína levaba por diante a unha xeración en Euskal Herria –e tamén na Galiza, por certo-.

Seguir lendo

Senso | Alfred

  • Título: Senso.
  • Autor: Alfred.
  • Editorial: Ediciones Salamandra Graphic.
  • Lugar: Barcelona.
  • Ano de edición: 2022.
  • Número de páxinas: 160.
  • Prezo: 24€.

Sentir

Alfredéun autor dotado dunha especial sensibilidade e capacidade, tanto gráfica como narrativa, grazas e iso no 2014 gañou a Fauve d’Or no Festival de Angoulême con Come Prima (Salamandra Graphic). Desta volta publica Senso, un cómic poético que cun deliberado ritmo pausado que nos fai transitar polas sensacións para levarnos, con moita habilidade, até o punto emocional dos protagonistas. 

Germano, un home xa na madurez, baixa do tren na estación de destino para descubrir que todo o que podía complicarse vaise complicar. No hotel hai unha voda, fai un calor asfixiante e non paran de xurdir problemas. Porén, coñece a Elena, coa que vai tecendo unha estraña relación que comeza con encontros breves que lle punzan nos sentidos. Os dous están nun momento vital complexo e a súa será unha historia con idas e voltas até que, finalmente, a conexión total entre eles obrigaralles a tomar decisións.

Seguir lendo